ពិតជាចម្លែកមែនពិភពលោករបស់យើង មានរឿងរ៉ាវសព្វបែបយ៉ាង ដែលរឿងខ្លះគួរឱ្យហួសចិត្ត រឿងខ្លះគួរឱ្យអស់សំណើច តែក៏មានរឿងខ្លះគួរឱ្យ ធុញទ្រាន់ដែរ ។
ឥឡូវសូមយករឿងប្លែកនៅស្រុកថៃ ដែលមានតារាសម្តែងស្រីម្នាក់ ប្រកាសរកប្តី ដោយឡើងស្លាក (ប៉ាន់ណូ) ដ៏ធំ ដូចក្រុមហ៊ុនផ្សេងៗផ្សាយផលិតផលរបស់ខ្លួនអ៊ីចឹង ) ។
រូបភាពជាស្ត្រីសិចស៊ី បញ្ចេញគល់សុដន់ដ៏ធំទ្រលុកទ្រលន់ នៅះគឺរូបរបស់ នាង ពុយ អៈរញ្ញយ៉ា អាយុ ៤០ ឆ្នាំ ជាក្រមុំសៅកែ បានជួលជាងតម្លើងប៉ាន់ណូ ដាក់ប្រកាសរកប្តី ថែមទាំងដាក់លេខទូរស័ព្ទយ៉ាងហ៊ឺហាទៀតផង តែត្រូវប៉ូលិសបញ្ជាឱ្យទម្លាក់ស្លាកនោះចោល ព្រមទាំងត្រៀមបញ្ជូនសំណុំរឿងទៅតុលាការទៀតផង ។
ខ្លឹមសារដែលមានអក្សរធំៗដាក់ថា «អាយុ ៤០ ឆ្នាំ ពុយ អៈរញ្ញយ៉ា ប្រកាសរកប្តី សុំម្តង…មុនស្លាប់» ។ អាជ្ញាធរមូលដ្ឋានថៃនិយាយថា ប៉ាន់ណូនេះបានលួចតម្លើងកាលពីថ្ងៃទី ២៨ ខែមេសា ក្រោយពីបានសេចក្តីរាយការណ៍ ក៏បានបញ្ជាឱ្យទម្លាក់ចុះវិញ ។ តាមច្បាប់នៅស្រុកថៃ អ្នកប្រព្រឹត្តអាក្រាតកាយ ឬ មានអំពើលាមក មានកម្រិតទោសជាប់គុកពី ៦ ខែទៅ ២ ឆ្នាំ ឬ ពិន័យជាប្រាក់ ៤ មុឺនបាទ ។
ប៉ាន់ណូធំៗបែបនេះ នៅស្រុកខ្មែរបង់ពន្ធប្រចាំឆ្នាំថ្លៃរាប់មុឺនដុល្លារ តែនៅថៃមិនដឹងថ្លៃប៉ុន្មាន ៕
