បន្ទាប់ពីជំនួបទ្វេភាគីរវាងអាមេរិក និងចិនបានបិទបញ្ចប់ទៅនៅសេតវិមានអាមេរិក ប្រធានាធិបតីអាមេរិក លោក Obama បានប្រកាសថា ចិន និងអាមេរិក នឹងធ្វើការរួមគ្នា ដើម្បីទប់ស្កាត់ការវិវត្តន៍ថ្មីៗ ទាក់ទងនឹងការសាកល្បងមីស៊ីលរបស់ប្រទេសឯកា កូរ៉េខាងជើង ។ក្នុងជំនួបនាថ្ងៃព្រហស្បតិ៍នេះ លោក Obama បាននិយាយថា ប្រទេសទាំង២នឹងរួមគ្នា ធ្វើយ៉ាងណាឲ្យឧបទ្វីបកូរ៉េ ក្លាយជាតំបន់ដែលគ្មានអាវុធនុយក្លេអ៊ែរ ព្រោះការសាកល្បងគ្រាប់បែកអ៊ីដ្រូហ្សែន និងការសាកល្បងមីស៊ីលនោះ គឺជាការរំលោភលើការបទបញ្ជារបស់អន្តរជាតិ ។
កាលពីខែមករាកន្លងទៅនេះ កូរ៉េខាងជើងបានធ្វើការសាកល្បងគ្រាប់បែកអ៊ីដ្រូហ្សែនមួយគ្រាប់ ហើយថែមទាំងបាញ់សាកល្បងមីស៊ីលរយៈចម្ងាយឆ្ងាយមួយគ្រាប់ទៀតក្នុងខែកុម្ភៈ ដែលវាត្រូវបានគេចាត់ទុកថា ជាការគំរាមដល់លោកខាងលិចជាពិសេស ។ចាប់ពីពេលនោះមក រដ្ឋាភិបាលទីក្រុង Washington និងអង្គការសហប្រជាជាតិបានដាក់ទណ្ឌកម្មបន្ថែមលើទីក្រុងព្យុងយ៉ាង ហើយវាក៏ទទួលបានការគាំទ្រពីសម្ព័ន្ធមិត្តដ៏ជិតស្និទ្ធបំផុតរបស់កូរ៉េខាងជើងដែរ នោះគឺមហាអំណាចចិន បន្ទាប់ពីចិន និងអាមេរិក ចំណាយពេលអស់ដល់ទៅ២ខែ ដើម្បីពិភាក្សាគ្នាលើទណ្ឌកម្មនេះ ៕
