ភ្នំពេញ ៖ ក្រុមអ្នកនិយមតាមដានសាច់រឿងពីតារាសិល្បៈក្នុងស្រុកបាននិងកំពុងនាំគ្នាខ្សឹបខ្សៀវអំពីសម្ពន្ធភាពស្នេហ៍ក្រៅឆាក រវាងតារាសម្ដែង និងជាពិធីការិនីនិយមការស្លៀកពាក់សិចស៊ី កញ្ញា វីត វីត ជាមួយបុរសមានវ័យជាង៣០ឆ្នាំម្នាក់ ស្របពេលមានព័ត៌មានលេចឮថាមានលោកមន្ត្រីធំក្នុងស្រុកក៏កំពុងតាមទាក់ទងសុំស្នេហ៍នាងយ៉ាងប្រកិតផងនោះ។
ក្រោយពីជោគជ័យខ្លាំងក្នុងអាជីពសិល្បៈមកនោះ ពិធីការិនីវ័យក្មេងសម្ដីផ្អែម កញ្ញា វីត វីត ហាក់លេចមានយីអ៊ុនស្នេហ៍មិនធម្មតាឡើយ។ ខណៈពេលថ្មីៗនេះ មានការទម្លាយឲ្យដឹងពីប្រភពមជ្ឈដ្ឋានខាងក្រៅថា តារាស្រីសាច់សខ្ចីដូចបណ្ដូលចេករូបនេះកំពុងភ្ជាប់ស្នេហ៍ជាមួយបុរសជំនួញសម្បូរទ្រព្យក្រៅស្រុកម្នាក់យ៉ាងផ្អែមល្ហែមផងដែរ។
តាមប្រភពដែលខ្សឹបខ្សៀវគ្នាក្រៅរង្វង់សិល្បៈបាននិយាយឲ្យដឹងថា អ្នកជំនួញម្នាក់នោះ កំពុងភ្ជាប់ទំនាក់ទំនងស្នេហាជាកញ្ញា វីត វីត យ៉ាងជិតស្និទ្ធបំផុត។ មិនតែប៉ុណ្ណោះក៏មានការសង្ស័យថា រាល់ការចាយវាចំណាយទៅលើការទិញសម្ភារៈមានតម្លៃថ្លៃៗទំនងនាងបានមកពីការជួយឧបត្ថម្ភជ្រោមជ្រែងពីបុរសជាគូស្នេហ៍រស់នៅទឹកដីសហរដ្ឋអាមេរិកម្នាក់នេះក៏ថាបាន។
យ៉ាងណាក្តីរហូតមកទល់ពេលនេះ ពុំទាន់មានប្រភពច្បាស់ការណាមួយបញ្ជាប់ឲ្យច្បាស់ទេថា តើពួកគេទាំងពីរខាងលើនេះបានមានទំនាក់ទំនងស្នេហាជាគ្នាប៉ុន្មានឆ្នាំមកហើយនោះទេ ព្រោះរឿងនេះទើបតែបែកធ្លាយចេញមកខាងក្រៅក្នុងពេលថ្មីៗនេះតែប៉ុណ្ណោះ។ ម្យ៉ាងទៀត តារាស្រីរូបនេះតែងព្យាយាមលាក់បាំងបានយ៉ាងល្អចំពោះរឿងមានទំនាក់ទំនងស្នេហាក្រៅឆាក។
ទាក់ទងនឹងការលេចឮព័ត៌មាននិយាយខ្សឹបខ្សៀវខាងលើនេះដែរ កម្ពុជាថ្មីមិនទាន់អាចស្វែងរកការបំភ្លឺផ្ទាល់មាត់ពីកញ្ញា វីត វីត បានទេ នៅរសៀលថ្ងៃទី២៨ ខែមីនា ឆ្នាំ២០១៦នេះ។ ដូច្នេះយើង នឹងព្យាយាមស្វែងរកការបកស្រាយការពិតពីពិធីការិនីស្រី កញ្ញា វីត វីត នៅពេលក្រោយ ដើម្បីបញ្ជាប់ប្រាប់ការពិតជុំវិញរឿងនេះ៕
