លោក គីម ជុងអ៊ុន ប្រឈមនឹងគ្រោះថ្នាក់បង្កឡើងដោយមនុស្សក្នុងជួរថ្នាក់ដឹកនាំរដ្ឋាភិបាល ហើយសមាជិកផ្ទៃក្នុងរបស់ក្រុមមេដឹកនាំ កូរ៉េខាងជើង អាចជាមនុស្សធ្វើឃាតមេដឹកនាំរបស់ខ្លួន ។ នេះបើតាមការសិក្សារបស់អ្នកជំនាញមកពីសាកលវិទ្យាល័យ Georgetown ក្នុងទីក្រុង វ៉ាស៊ីនតោន និងបានចុះផ្សាយនៅក្នុងទិនានុលេខន៍ស្ដីអំពីការវិភាគទៅលើប្រទេស កូរ៉េ ដែលបានសិក្សាទៅលើប្រវត្តិនៃផែនការលួចធ្វើឃាតមេដឹកនាំ កូរ៉េខាងជើង ប៉ុន្តែផែនការទាំងនោះសុទ្ធតែត្រូវបានបំផ្លាញ ។
តាមរយៈការសិក្សាបង្ហាញថា ភាពតានតឹងទាំងផ្ទៃក្នុង និងពីខាងក្រៅ ធ្វើឲ្យលោក គីម ជុងអ៊ុន អាចក្លាយជាជនរងគ្រោះម្នាក់ក្នុងចំណោមទម្រង់នៃផែនការធ្វើឃាត ៤ យ៉ាង ដែលធ្លាប់កើតមានកន្លងមកទៅលើមេដឹកនាំសំខាន់ៗ ។
ទម្រង់នៃការធ្វើឃាតទី ១ មានឈ្មោះថាទម្រង់ គីម ចូយូ (Kim Jae-gyu) គឺជាឈ្មោះរបស់ភ្នាក់ងារសម្ងាត់ កូរ៉េខាងត្បូង ដែលជាអ្នកធ្វើឃាតប្រធានាធិបតី កូរ៉េខាងត្បូង លោក ប៉ាក ឆុងហេ (Park Chung-hee) ក្នុងឆ្នាំ ១៩៧៩ ជាឃាតកម្ម ធ្វើឡើងតែម្នាក់ឯង ។ ឃាតកគឺជាភ្នាក់ងារសម្ងាត់របស់ប្រទេស កូរ៉េខាងត្បូង ហើយសម្រាប់មេដឹកនាំ កូរ៉េខាងជើង ការធ្វើឃាតទម្រង់ទីមួយនេះ អាចទទួលបានជោគជ័យច្រើនបំផុត ។អ្នកសិក្សាបញ្ជាក់ថា ប្រសិនបើការធ្វើឃាតលោក គីម ជុងអ៊ុន កើតឡើង គឺអាចជាការធ្វើឃាតដែលអនុវត្តដោយមនុស្សម្នាក់ក្នុងចំណោមមន្ត្រីកំពូលៗរបស់ កូរ៉េខាងជើង ជាអ្នកអាចស្ថិតនៅជិតបំផុតជាមួយលោក គីម ជុងអ៊ុន ក្រៅពីពិធីសាធារណៈណាមួយ ជាពេលដែលការយាមកាមធូររលុងជាងធម្មតា ។ ម្យ៉ាងវិញទៀត ការធ្វើឃាតទម្រង់បែបនេះ អាចជោគជ័យច្រើន ព្រោះមិនត្រូវការជំនួយពីមនុស្សច្រើននាក់ នាំឲ្យមានការព្រួយបារម្ភខ្លាចមានអំពើក្បត់គ្នាក្នុងចំណោមឃាតក ។
ទម្រង់នៃការធ្វើឃាតទី ២ មានឈ្មោះថាទម្រង់ ប្រ៊ូតូស (Brutus) ជាឈ្មោះរបស់សមាជិកព្រឹទ្ធសភា សម័យ រ៉ូម៉ាំង គ្រប់គ្រងប្រទេស អីុតាលី ឃាតកម្មនេះ ធ្វើឡើងដោយមនុស្សមួយក្រុមភាគច្រើនមនុស្សសាមញ្ញ ដឹកនាំដោយឥស្សរជនមួយរូប។ នេះជាឃាតកម្មតាមរបៀបនៃការធ្វើឃាត ដឹកនាំដោយសមាជិកព្រឹទ្ធសភា ប្រ៊ូតូស សម្លាប់ Julius Caesar ដែលជាមេដឹកនាំកំពូលរបស់សម័យកាលរ៉ូម៉ាំង កាលពី ៤៤ ឆ្នាំ មុនគ្រិស្តសករាជ ។ ដោយសារផែនការធ្វើឃាតទម្រង់ទីពីរ ត្រូវការមនុស្សច្រើនចូលរួម ដូច្នេះហើយ ផែនការត្រូវប្រឈមនឹងការបែកធ្លាយ ។
ទម្រង់នៃការធ្វើឃាតទី ៣ មានឈ្មោះថាទម្រង់ វ៉ាល់គីរៀ (Valkyrie) សំដៅទៅរកមនុស្សជំនិត និងស្មោះត្រង់បំផុតរបស់ណាហ្ស៊ី អាល្លឺម៉ង់ ដែលរៀបចំធ្វើឃាត អាដហ្វ អីុត្លៀ (Adolf Hitler) ក្នុងឆ្នាំ ១៩៤៤ ប៉ុន្តែមានរបៀបជារដ្ឋប្រហារ ទម្លាក់របបគ្រប់គ្រងមួយ ។ ទម្រង់ វ៉ាល់គីរៀ ទំនងជាពិបាកនឹងទទួលបានជោគជ័យណាស់ ព្រោះការធ្វើរដ្ឋប្រហារនៅក្នុងប្រទេស កូរ៉េខាងជើង គឺជារឿងដែលពិបាកនឹងកើតមានឡើង ដោយរបបលោក គីម ជុងអ៊ុន បានរៀបចំប្រព័ន្ធការពារយ៉ាងរឹងមាំ ទប់ទល់នឹងរដ្ឋប្រហារ ដោយផ្ដល់សំណូកជាផលប្រយោជន៍ធំធេងដល់ឥស្សរជនសំខាន់ៗ ដើម្បីឲ្យអ្នកទាំងនោះសហការ និងស្មោះត្រង់ជាមួយមេដឹកនាំ ហើយកម្ចាត់អ្នកទាំងឡាយណាដែលបង្ហាញសញ្ញាមិនសហការ ។
ទម្រង់នៃការធ្វើឃាតទី ៤ មានឈ្មោះថាទម្រង់ អូស្វល (Oswald) ជាឈ្មោះរបស់អ្នកបាញ់កាំភ្លើងស៊ីប ដែលបានធ្វើឃាតប្រធានាធិបតី សហរដ្ឋអាមេរិក លោក John F. Kennedy ក្នុងឆ្នាំ ១៩៦៣ ។ អ្នកវិភាគជឿថា ទោះជាឃាតករកបានកាំភ្លើងស៊ីបមួយដើម ក៏ឃាតកនោះពិបាកក្នុងការស្ថិតនៅក្នុងចម្ងាយមួយជិតល្មមអាចធ្វើឃាតលោក គីម ជុងអ៊ុន ដោយសារប្រព័ន្ធសន្តិសុខមានចម្ងាយរាប់គីឡូម៉ែត្រពីមេដឹកនាំ កូរ៉េខាងជើង ។
ម្ចាស់អត្ថបទទិនានុលេខន៍សរសេរថា សហគមន៍អន្តរជាតិ មិនបានត្រៀមខ្លួនសម្រាប់លទ្ធផលដែលកើតឡើងដោយសារការធ្វើឃាតលោក គីម ជុងអ៊ុន ដែលអាចកើតឡើងនៅពេលណាមួយ ជាពេលដែលអំណាចស្ថិតនៅចំហ ដែលនាំទៅរកការបែកបាក់ដណ្ដើមអំណាចគ្នា ហើយឈានទៅផ្ទុះសង្គ្រាមស៊ីវិល រហូតដល់អាចមានការប្រើប្រាស់អាវុធមហាប្រល័យទៀតផង ។
