ភ្នំពេញ ៖ បន្ទាប់ពីមានសារព័ត៌មានក្នុងស្រុកមួយចំនួនបានធ្វើការចុះផ្សាយថា ប្រសិនបើមានខាងផលិតករណាហ៊ានឲ្យតម្លៃខ្លួនខ្ពស់ តារាស្រីកញ្ញា គង់ វង្សយ៉ាទី នឹងហ៊ានប្រថុយថតស្រាត ប៉ុន្តែភ្លាមៗនេះដែរ គេសង្កេតឃើញសាមីខ្លួននាង គង់ វង្សយ៉ាទី ក៏បានបញ្ចេញប្រតិកម្មបង្ហាញអារម្មណ៍ខឹងសំបារមិនសប្បាយចិត្ត និងទទូចសុំចិត្តអ្នកសារព័ត៌មានឲ្យចេញផ្តល់តម្លៃសម្រាប់នាងផង។
តាមរយៈខ្លឹមសារ ដែលត្រូវបានពិធីការិនី កញ្ញា គង់ វង្សយ៉ាទី សរសេរបង្ហោះនៅលើបណ្ដាញសង្គមហ្វេសប៊ុកនាងបានលើកឡើងថា សម្រាប់ខ្ញុំលុយគឺស្រួលរក តែកេរ្តិ៍ឈ្មោះ និងកិត្តិយសគឺពិបាករកនិងសាងឡើងណាស់បាប និងបុណ្យមានពិត សូមកុំដោយសារផលប្រយោជន៍ខ្លួនឯងបំផ្លាញអ្នកដទៃ។
តារាស្រី កញ្ញា គង់ វង្សយ៉ាទី បានបញ្ជាក់ទៀតថា សូមបងសារព័ត៌មានទាំងអស់គ្នាជួយចុះព័ត៌មាននិងចំណងជើងឲ្យខ្ញុំ ដោយផ្តល់តម្លៃខ្ញុំជាស្ត្រីខ្មែរផង ខ្ញុំពិតជាទទួលយកមិនបាននូវព័ត៌មានចុងក្រោយ ព្រោះតែចំណងជើង។
ដោយឡែកនៅរសៀលថ្ងៃទី២៥ ខែកុម្ភៈ ឆ្នាំ២០១៦កម្ពុជាថ្មីមិនអាចទំនាក់ទំនង ដើម្បីសុំការសួរនាំបន្ថែមពីកញ្ញា គង់ វង្សយ៉ាទី ជុំវិញរឿងរ៉ាវខាងលើនេះបានទេ ព្រោះលេខទូរស័ព្ទនាងតេចូលជាច្រើនសាគ្មានអ្នកទទួល។
សូមបញ្ជាក់ថា ប្រតិកម្មឆ្លើយតបពីសំណាក់តារាសម្ដែងគ្រងតំណែងជាតួឯកក្នុងខ្សែភាពយន្តរឿង ខ្មោចប្រពន្ធស្ដេចល្បែង និងក៏ជាពិធីការិនីកញ្ញា គង់ វង្សយ៉ាទី ខាងលើនេះធ្វើឡើង ក្រោយពីមានសារព័ត៌មានក្នុងស្រុកធ្វើការចុះផ្សាយយ៉ាងព្រោងព្រាត ដោយបាននិយាយថា គង់ វង្សយ៉ាទី ប្រសិនមានគេឲ្យតម្លៃខ្ពស់ថតស្រាត ក៏នាងហ៊ានប្រថុយពោលគឺមិនឲ្យចាញ់តារាស្រីនាង ឌុច លីដា ឡើយ៕
