ខេត្តក្រចេះ៖ សមត្ថកិច្ចបានធ្វើសន្និសីទសារព័ត៌មានបង្ហាញមុខជនដៃដល់ ជាឃាតកដ៏សាហាវយង់ឃ្នងដែលបានកាប់សម្លាប់កូនក្រមុំរបស់ខ្លួន ក្នុងថ្ងៃរៀបមង្គលការ នាម៉ោង១២ថ្ងៃត្រង់ ថ្ងៃទី២៨ ខែកុម្ភៈ ឆ្នាំ២០១៦ នៅស្នងការដ្ឋាននគរបាលខេត្តក្រចេះ។
នគរបាលព្រហ្មទណ្ឌខេត្តនិងស្រុកស្នួល ក្រោមការចង្អុលបង្ហាញពី សំណាក់លោកឧត្ដមសេនីយ៍ លន់ សុផាត ស្នងការនគរបាលខេត្ត ដឹកនាំបញ្ជាដោយលោកចាន់ សុគីម អធិការនគរបាលស្រុក បានបើកប្រតិបត្តិការស្រាវជ្រាវមានរយៈពេលជាង១០ម៉ោង ក្រោយកើតហេតុ ទើបបំបែកសំណុំរឿងករណីអំពើឃាតកម្មវាយសម្លាប់កូនក្រមុំ នៅថ្ងៃចូលរោងការ ក៏ឈានឲ្យមានការចាប់បានឃាតកជាជនដៃដល់គឺជាកូនកំលោះ។
លំនៅឋានមួយដែលមានរៀបពិធីមង្គលការប្រព្រឹត្តទៅ បានមួយល្ងាចនៃថ្ងៃសូត្រមន្ត ក្រុងពាលី របស់គ្រួសារកូនក្រមុំបានបន្លឺមេក្រូយ៉ាងទ្រហឹងអឺងកង នៅកណ្ដាលភូមិ ក្នុងភូមិមាក់កណ្ដាល ឃុំស្រែចារ ស្រុកស្នួល បានប្រែក្លាយទៅជាផ្ទះធ្វើពិធីបុណ្យសព ចាក់មេក្រូស្មូតទៅវិញ បន្ទាប់កូនក្រមុំត្រូវបានគេលួចវាយសម្លាប់ស្លាប់នៅកណ្តាលវាលស្រែខាងក្រោយផ្ទះ នៅវេលាជិតពាក់កណ្តាលយប់ថ្ងៃទី២៦ ខែកុម្ភៈ ឆ្នាំ២០១៦ ជាថ្ងៃចូលរោងការ ដោយជនដៃដល់ជាកូនកម្លោះឈ្មោះ ឡើត ឆើត ហៅ ផេះ អាយុ២០ឆ្នាំ។
អធិការនគរបាលស្រុកស្នួល លោក ចាន់ សុគីម បានឲ្យដឹងថា នារីរងគ្រោះជាកូនក្រមុំឈ្មោះ ម៉ុន ញឹប ហៅ ក្តឹប អាយុ១៩ឆ្នាំ ត្រូវជនដៃដល់ជាកូនកំលោះប្រដាប់ដោយព្រនុងប្រវែងកន្លះមែត្រនិងពិលដែក វាយសម្លាប់រឹតកនឹងក្រម៉ា ខណៈដែលនារីរងគ្រោះបានដើរទៅងូតទឹកនៅអូរ វេលាជិតពាក់កណ្ដាលយប់ ក្រោយពីពិធីសូត្រមន្តចូលរោងចប់ជាមួយនិងជនដៃដល់ជាកូនកំលោះ។
លោកបន្តថា ផែនការរបស់ជនសង្ស័យក្រោយ ពីការវាយសម្លាប់នារីរងគ្រោះឲ្យស្លាប់ហើយ និងបំភ័ន្តរូបភាពថា ពួកគេត្រូវគេលួចកាប់សម្លាប់ តែក្រោយពីចុះតាមដានស្រាវជ្រាវស៊ើបអង្កេត នៅកន្លែងកើតហេតុ នគរបាលបានកំណត់ថា ករណីនេះគឺផ្តើមចេញដោយជនដៃដល់ជាកូនកំលោះ ក៏ឈានឲ្យមានការចាប់ខ្លួន។
បើតាមចម្លើយសារភាពរបស់ជនដៃដល់នេះ បានសារភាពថា គេពិតជាបានសម្លាប់នារីរងគ្រោះជាកូនក្រមុំ ដោយសារតែរូបគេមិនស្រឡាញ់ពេញចិត្ត និងចោទថាកូនក្រមុំជាមនុស្សមានប្រវត្តិមិនល្អ ម្យ៉ាងទៀតឪពុកម្ដាយខាងកូនក្រមុំគំរាមថានិងប្តឹងឲ្យមានសំណង បើរូបគេផ្តាច់ពាក្យមិនរៀបការ។
ជននេះឆ្លើយទៀតថា កន្លងមករូបគេចង់ធ្វើអត្តឃាតសម្លាប់ខ្លួនតែមិនដាច់ចិត្ត ដោយសារអាណិតឪពុកម្ដាយដែលក្រីក្រ ទើបរូបគេបែកគំនិតហ៊ានសម្លាប់កូនក្រមុំ ដើម្បីបំបិទមាត់តែម្ដងនៅ ពេលដែលមានឱកាស។ នេះបើយោងតាមប្រភពពីស្នងការដ្ឋាននគរបាលខេត្ដ ក្រចេះ៕
