ឌួង ហ្សូរីដា៖ ឧកញ៉ា ម៉ុង រិទ្ធី ម្នាក់គត់ដែលខុសពីឧកញ៉ាៗក្នុងចំណោមអ្នកមានលុយរាប់លាន
សិល្បៈ៖ តារាសម្ដែង និងជាពិធីការិនី ឌួង ហ្សូរីដា បានបង្ហាញអារម្មណ៍សប្បាយចិត្ត ក្នុងឱកាសបានជួបនិងទទួលការស្វាគមន៍ដោយភាពកក់ក្ដៅពីសំណាក់ លោកឧកញ៉ា ម៉ុង រិទ្ធី និងលោកជំទាវ ព្រមទាំងក្រុមគ្រួសារ និងបានកោតសរសើរចំពោះលោកឧកញ៉ា ម៉ុង រិទ្ធី ដែលជាមនុស្សតែម្នាក់គត់ដែលនាងធ្លាប់ជួប ក្នុងចំណោមឧកញ៉ាៗ អ្នកមានលុយរាប់លាន ដែលគិតគូរពីសុខទុក្ខពិតប្រាកដរបស់ប្រជាជន យុទ្ធសាស្ត្រនៃការជួយមនុស្សរបស់លោក។
ឌួង ហ្សូរីដា បានសរសេរបង្ហោះលើ Instagram របស់នាងថា៖ "ក្នុងនាមខ្ញុំជាសហគ្រិនស្ត្រីម្នាក់ ក្នុងចំណោមបងៗសហគ្រិនស្ត្រី (CWEA) ដទៃទៀតដែលមានឱកាសបានជួប និងទទួលការស្វាគមន៍ដោយភាពកក់ក្ដៅពីសំណាក់ លោកឧកញ៉ា ម៉ុង រិទ្ធី និង លោកជំទាវ ព្រមទាំងក្រុមគ្រួសារ បុគ្គលិករបស់លោក យើងពិតជាមានមោទនភាពនូវស្នាដៃនៃការដឹកនាំរបស់លោក ប្រកបដោយភាពប៉ិនប្រសព្វ កែច្នៃ ឆ្លាតវៃ ម៉ត់ចត់ និង មានការយកចិត្តទុកដាក់គ្រប់ជ្រុងជ្រោយ"។
ឌួង ហ្សូរីដា បន្ត៖ "លោកបានចែករំលែកនិងបើកឱកាសឲ្យយើងសួររាល់បទពិសោធន៍ការងារដែលលោកមាន ប្រាកដណាស់ កើតជាមនុស្សត្រូវតែមានក្តីស្រមៃ ហើយយើងត្រូវតែខិតខំ ប្រឹងប្រែងរៀនសូត្រ ដើម្បីអោយក្តីស្រមៃរបស់យើងក្លាយជាការពិតនៅថៃ្ងណាមួយ ហើយក្តីស្រមៃនោះសោតត្រូវតែភ្ជាប់ជាមួយការគិតគូរនិងចែករំលែកទៅដល់ប្រជាជនក្រីក្រ អ្នកខ្វះលទ្ធភាព ដើម្បីអោយពួកគេមានឱកាសអភិវឌ្ឍន៍ខ្លួនឯងនិងក្រុមគ្រួសារ កូនចៅជំនាន់ក្រោយរបស់ពួកគេបន្តទៀត នោះមានន័យថា យើងនឹងក្លាយជាបុគ្គលម្នាក់ដែលជោគជ័យពិតប្រាកដហើយត្រូវបានប្រជាជនស្រលាញ់ចូលចិត្តទុកជាបុគ្គលគំរូ"។
តារាសម្ដែង និងជាពិធីការិនីរូបនេះ បានបញ្ជាក់ថា៖ "អាចនិយាយបានថា ខ្ញុំទើបតែឃើញលោកឧកញ៉ា ម៉ុង រិទ្ធី ម្នាក់គត់ក្នុងចំណោមឧកញ៉ាៗ អ្នកមានលុយរាប់លាន ដែលគិតគូរពីសុខទុក្ខពិតប្រាកដរបស់ប្រជាជន យុទ្ធសាស្ត្រនៃការជួយមនុស្សរបស់លោក គឺចាប់ផ្ដើមពី A-Z មិនមែនគ្រាន់តែជាការជួយដោយយកត្រឹមតែថតរូបដាក់ Facebook ហើយបង្អួតបង្ហាញតែសំភារះនិយមថ្លៃៗដាក់គ្នាទៅវិញទៅមកនោះទេ"។
"ប្រសិនបើអ្នកមានស្រុកខ្មែរដកតែលុយទិញកាបូប សំភារះថ្លៃៗខ្លះៗ មកជួយប្រជាជនក្រីក្រ រឺក៏ចូលរួមឧបត្ថម្ភគាំទ្រការងារមនុស្សធម៌តាមសមាគមន៍ អង្គការផ្សេងៗជារៀងរាល់ខែ រឺពេលចុះយុទ្ធនាការផ្សេងៗ នោះភាពក្រីក្ររបស់ប្រជារាស្ត្រខ្មែរនឹងកាត់បន្ថយបានលឿន ហើយអស់លោកនឹងត្រូវបានគេកត់សំគាល់ និងចារឈ្មោះក្នុងប្រវត្តិសាស្ត្រល្អជាក់ជាពុំខាន..!!! Just My Idea..!!!” ៕
