ក្រោយពីការទទួលដំណឹងថាអ្នកនាង ឆៃ លីដាឡែន បានចេញទៅសម្ដែងនៅសហរដ្ឋអាមេរិក មកស្រាប់តែថ្មីៗនេះបានលេចចេញឃ្លីបវីដេអូ របស់នាងដែលឡើងច្រៀងលើឆាកតន្រី្ដក្នុងទ្រង់ទ្រាយតូចមួយ។ សកម្មភាពនោះគេឃើញមានការរាំគ្រលែងចង្កេះ ពើងមុខពើងក្រោយ ជាមួយ នឹងសម្លេងថ្ងួចថ្ងូររបស់នាង ដែលប្រិយមិត្ដអ្នកស្ដាប់មួយចំនួនបានលើកឡើងថា ច្រៀងមិនចំច្រៀង ថ្ងូរមិនចំថ្ងូរ។
នៅពេលតារាសិល្បៈខ្មែរចេញទៅច្រៀងនៅក្រៅប្រទេសម្ដងៗ អ្នកសារព័ត៌មានបានសាកសួរពួកគេពីការពាំនាំយកវប្បធម៌ប្រពៃណីខ្មែរទៅបង្ហាញនូវបរទេសដែរ ហើយត្រូវបានតារាភាគច្រើន បង្ហាញពីចំណាប់អារម្មណ៍ ខ្លួនបានត្រៀមបទចម្រៀង និងទេពកោសល្យសម្ដែងមួយចំនួនយកទៅសម្ដែង អោយអ្នកនៅឯនាយសមុទ្របានទស្សនា និងដឹងពីអត្ដសញ្ញាណទម្រង់សិល្បៈវប្បធម៌ប្រពៃណីខ្មែរ។
ដោយឡែកពាក់ព័ន្ធនឹងឃ្លីបវីដេអូរបស់កញ្ញា ឆៃ លីដាឡែន វិញត្រូវបានមហាជន មួយចំនួនលើកជាសំនួរថា តើនោះជាបទចម្រៀងបែបវប្បធម៌ប្រពៃណីខ្មែរ ឬយ៉ាងណា? បានជាឮសូរតែសំឡេងថ្ងួចថ្ងូរអមជាមួយ។ អ្នកខ្លះក៏បានលើកឡើងទៀតថា វាគ្មានអ្វីទាស់ខុសទេគ្រាន់តែ ការរាំបែបនេះ ប្រហែលជានាងធ្វើបែបនេះចង់តម្រូវចិត្ដអ្នកទស្សនានៅទីនោះអោយមានភាពសប្បាយរីករាយ និងទទួលបានលុយធីបច្រើនតែប៉ុណ្ណោះ។
ទោះយ៉ាងណាយើងក៏មិនហ៊ានវិនិច្ឆ័យថា ការរាំបែបនេះជាទង្វើរខុស ឬត្រូវបែបណាទេ? មានតែទស្សនិកជនទេដែលអាចដាក់ពិន្ទុ ឬវិនិច្ឆ័យថា នាងធ្វើបែបនេះល្អឬយ៉ាងណា?។
នេះជាការភ្ញាក់ផ្អើលលើកទី២ បន្ទាប់ពីនាងទៅសម្តែងនៅបរទេសដោយប្រើរូបភាពសិចស៊ី រហូតធ្វើឲ្យក្រសួងវប្បធម៌ខ្មែរព្រមាន និងមិនត្រូវបានម្ចាស់ស្ថានីយ៍ទូរទស្សន៍ជាច្រើនឈប់ហៅទៅឡើងសម្តែង។ ប៉ុន្តែលើកនេះពុំទាន់មានការប្រតិកម្មពីមន្ត្រីនៃក្រសួងវប្បធម៌កម្ពុជាទៀត ឬយ៉ាងណាឡើយ៕
