ស្វាយរៀង ៖ ជនសង្ស័យម្នាក់ ត្រូវបានកម្លាំងប៉ុស្តិ៍រដ្ឋបាលសង្កាត់បាវិត ធ្វើការឃាត់ខ្លួនកាលពីវេលាម៉ោង១៤និង១០នាទីថ្ងៃទី២៥ ខែកុម្ភៈ ឆ្នាំ២០១៦ ខណៈដែលគេរងការចោទប្រកាន់ពីនារីម្នាក់ថា បានចាប់រំលោភសេពសន្ថវៈបានសម្រេចនៅបន្ទប់ ស្នាក់នៅក្នុងហាងប៉ាប៉ាសបារ ត្រង់ចំណុចផ្សាររាលត្រី ស្ថិតនៅក្នុងភូមិបាវិតកណ្ដាល សង្កាត់ក្រុងបាវិត។
បើតាមសមត្ថកិច្ចប៉ុស្តិ៍នគរបាលសង្កាត់បាវិតបានឲ្យដឹងថា ជនសង្ស័យ ដែលត្រូវធ្វើការឃាត់ខ្លួននេះ មានឈ្មោះ ចាន់ ណាង ភេទប្រុស អាយុ២៣ឆ្នាំ មានមុខរបរជាបុគ្គលិករត់តុហាងប៉ាប៉ាសបារដែលមានទីលំនៅភូមិបាវិតកណ្ដាល សង្កាត់ក្រុងបាវិត។ រីឯនារីរងគ្រោះ មានឈ្មោះឈ ន ម មុខរបរជាអ្នករត់តុដូចគ្នា មានទីលំនៅក្នុងភូមិក្បាលទំនប់ សង្កាត់បឹងទំពុន រាជធានីភ្នំពេញ។
បើតាមនារីរងគ្រោះបានរៀបរាប់ឲ្យដឹងថា នៅថ្ងៃទី២៥ ខែកុម្ភៈ ឆ្នាំ២០១៦ វេលាម៉ោង៩ព្រឹកពេលខ្លួនកំពុងតែដេកក្នុងបន្ទប់ ស្រាប់តែ ឈ្មោះ ចាន់ សំណាង ចូលមកបន្ទប់របស់ខ្លួន ដោយបានចាប់ច្របាច់.ក និងខ្ទប់មាត់សង្កត់ពីលើ រួចសម្រាតខោអាវអស់ចេញពីខ្លួន ហើយចាប់រំលោភទាល់តែបានសម្រេច។
សមត្ថកិច្ចបានឲ្យដឹងទៀតថា ចំណែកជនសង្ស័យវិញ បានសារភាពថា ខ្លួនពិតជាបានចាប់រំលោភឈ្មោះ ឈ ន ម នេះពិតប្រាកដមែន ដោយសារស្រវឹងស្រា ហើយក៏ចាប់រំលោភតែម្តងទៅ។
បច្ចុប្បន្ន ជនសង្ស័យ ត្រូវបានសមត្ថកិច្ចបញ្ជូនខ្លួនមកស្នងការខេត្ត ដើម្បីចាត់ការទៅតាមនីតិវិធីច្បាប់៕
