ខេត្តបាត់ដំបង ៖ ទីតាំងខារ៉ាអូខេមួយកន្លែងមានយីហោ «ប៉ាស៊ីហ្វិក ណាយ ថិស» ត្រូវបានកម្លាំងព្រហ្មទណ្ឌខេត្ត ដឹកនាំផ្ទាល់ដោយលោកឧត្តមសេនីយត្រី ជេត វណ្ណី ស្នងការរងនគរបាលខេត្តបាត់ដំបង ចុះទៅធ្វើការបង្ក្រាប និងសម្រេចបិទទ្វារជាបណ្តោះអាសន្ន បន្ទាប់ពីមានបញ្ជា និងស៊ើបដឹងថា គឺជាកន្លែងជួលសម្រាប់ឱ្យក្រុមយុវជនប្រុស-ស្រី ចូលទៅប្រើប្រាស់គ្រឿងញៀនគ្រប់ប្រភេទ ។
ហេតុការណ៍ចុះបង្ក្រាបធ្វើឡើងនៅវេលាម៉ោង០៩ និង២០នាទីយប់ថ្ងៃទី១៣ មីនា ២០១៦ ស្ថិតនៅក្នុងបន្ទប់ចំនួន២ ក្នុងហាងខារ៉ាអូខេខាងលើ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដោយកម្លាំងឃាត់បានមនុស្សប្រុស-ស្រីចំនួន១៦នាក់ផងដែរ រួមទាំងវត្ថុតាងថ្នាំញៀនជាច្រើនទៀត ។
គួរបញ្ជាក់ថា ខារ៉ាអូខេខាងលើ គឺបម្រើសេវាដូចជា ប្រសិនបើមានក្រុមយុវជនចូលមក គឺពួកគេបានជួលបន្ទប់ផ្តាច់មុខ ដោយមិនអនុញ្ញាតឱ្យអ្នកណាម្នាក់ចេញ-ចូលក្នុងបន្ទប់នោះទេ គឺចាក់សោតែម្តងសម្រាប់ងាយស្រួល ពួកគេប្រើប្រាស់គ្រឿងញៀន ។
