ក្នុងឱកាសនៃពិធីបុណ្យទន្លេ ដែលធ្វើឡើងនៅខេត្តកំពង់ចាមនេះ ស្នងការដ្ឋាននគរបាលខេត្តកំពង់ចាមបានបង្ហាញមុខ មុខសញ្ញាដែលធ្លាប់ធ្វើសកម្មភាពកាត់ខ្សែក និងលូកហោប៉ៅ ជាច្រើននាក់ បន្ទាប់ពីពួកគេបានមកដល់ទឹកដីខេត្តកំពង់ចាម ដើម្បីចូលរួមពិធីបុណ្យទន្លេនេះដែរ ។
មុខសញ្ញាទាំងនោះ សុទ្ធតែធ្លាប់ត្រូវបានប៉ូលិសចាប់ខ្លួន នៅក្នុងពិធីបុណ្យសមុទ្រកន្លងផុតទៅ កាលពីឆ្នាំ២០១៤ ដោយពួកគេសុទ្ធតែតែងខ្លួនហ៊ឺហា អាចជៀសផុតពីការសង្ស័យបានយ៉ាងងាយ ។ ល្បិចរបស់ពួកគេមានដូចជា រុញរទេះជនពិកាមកក្បែរ ហើយឆក់ឬលួចឥវ៉ាន់ បន្ទាប់មកឲ្យជនពិកានោះទុកវត្ថុតាង ដើម្បីជៀសផុតពីការសង្ស័យបានយ៉ាងងាយ ។
ឆ្លៀតឱកាសនេះ ស្នងការដ្ឋាននគរបាលខេត្តកំពង់ចាម សូមជម្រាបជាដំណឹងដល់បងប្អូន ដែលចូលរួមពិធីបុណ្យទន្លេទាំងឡាយថា បើសិនជាឃើញមុខសញ្ញាទាំងនេះហើយ សូមមេត្តាបង្កើនការប្រុងប្រយ័ត្ន ហើយបើឃើញមានសកម្មភាពគួរឲ្យសង្ស័យណាមួយកើតឡើង សូមធ្វើការរាយការណ៍ទៅសមត្ថកិច្ចដែលនៅជិតលោកអ្នកបំផុត ៕
