ស្នងការបន្ទាយមានជ័យ សុំ ការយោគយល់ពីពលរដ្ឋគោរពច្បាប់ចរាចរ សមត្ថកិច្ចនឹងរឹត បន្តឹងផាក ពិន័យ
បន្ទាយមានជ័យ ៖ មុនការរឹតបន្តឹងផាកពិន័យ ក្នុងការអនុវត្តច្បាប់ចរាចរផ្លូវគោកថ្មី របស់នគរបាលចរាចរខេត្តបន្ទាយមានជ័យ ចាប់ពីថ្ងៃទី១៥ មីនា ២០១៦ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានសុំការយោគយល់ពីប្រជាពលរដ្ឋក្នុងខេត្ត អោយចូលរួមទាំងគ្នាគោរពច្បាប់ចរាចរ បន្ទាប់ពីលោក បានចុះផ្សព្វផ្សាយណែនាំដល់លំនៅឋាន ។
លោនកឧត្តមសេនីយ៍ទោ បានអោយដឹងទៀតថា ការរឹត បន្តឹង និងផាកពិន័យនេះ ធ្វើឡើងដើម្បីអាយុជីវិតយើងគ្រប់គ្នា ។ ការគោរពច្បាប់ចរាចរដូចជា បើកបរត្រូវគោរពច្បាប់ ត្រូវចេះយោគយល់គ្នាទៅវិញទៅមក កុំពិសារគ្រឿងស្រវឹង ត្រូវពាក់មួកសុវត្ថិភាព ពាក់ខ្សែក្រវ៉ាត់ពេលបើកបររថយន្ត បើកបរកុំ អោយលើសល្បឿនដែលច្បាប់កំណត់ ។
គួរបញ្ជាក់ថា ជាបន្តបន្ទាប់ ចាប់តាំងពីច្បាប់ចរាចរថ្មី ប្រកាសអោយប្រើប្រាស់ និងក្រសួងមហាផ្ទៃ ក៏ដូចជាអគ្គស្នងការនគរបាលជាតិ ដាក់ផែនការណ៍ផ្សព្វផ្សាយអនុវត្ត លោកបានចាត់វិធានការណ៍ដល់ការិយាល័យជំនាញ ទាំងការផ្សព្វផ្សាយអំពីច្បាប់ ការដាក់កម្លាំងអនុវត្តន៍ច្បាប់ចរាចរ រហូតដល់លោកបានផ្តល់មួកសុវត្ថិភាពដល់ប្រជាពលរដ្ឋ សិស្សសាលា ដែលប្រើម៉ូតូ និងបានពន្យល់ប្រជាពលរដ្ឋដល់លំនៅឋានអោយកាន់តែយល់ពីច្បាប់ចរាចរថ្មី ។
ឆ្លើយតបនិងការផ្សព្វផ្សាយណែនាំ អំពីច្បាប់ចរាចរខាងលើ ធ្វើអោយប្រជាពលរដ្ឋ បានយល់ច្បាស់អំពីច្បាប់ និងការផាកពិន័យ ។ តែទោះជាយ៉ាងណាក៏ដោយ ធន់តូចដឹកទំនិញផ្លូវប៉ោយប៉ែត ហាក់ដូចជា មិនបានចូលរួម ដោយគេសង្កេតឃើញថា នៅតែបើកបរក្នុងល្បឿនលឿន បង្កការភ័យក្លាចដល់ប្រជាពលរដ្ឋ ៕
