ភ្នំពេញ ៖ អ្នកមេម៉ាយរូបស្រស់សម្រស់ផូរផង់ គង់ សូនីតា បានចេញមុខទទូចស្នើឲ្យមហាជនយល់ចិត្តអ្នកសិល្បៈកុំរិះគន់វាយតម្លៃមនុស្សតែសំបកក្រៅតាមរយៈការស្លៀកពាក់តុបតែងខ្លួនបែកសិចស៊ីបញ្ចេញសាច់ខ្ចីខើចលើខើចក្រោម ខណៈកន្លងមកមានការរិះគន់មួយចំនួនពីសំណាក់ទស្សនិកជនលើកការស្លៀកពាក់ខ្លីសិចស៊ីរបស់តារាស្រីៗរបស់ខ្មែរ។
តារាស្រីមេម៉ាយកូនមួយនាង គង់ សូនីតា បានបង្ហាញអារម្មណ៍តាមរយៈការសរសេរបង្ហោះភ្ជាប់ជាមួយរូបថតសម្ញែងភាពសិចស៊ីបញ្ចេញសម្រស់ដើមទ្រូងថា កុំវាយតម្លៃមនុស្សត្រឹមតែសំបកក្រៅពេកមានពេលខ្លះម្នាក់ៗគេតម្រូវចិត្តខ្លួន គេតម្រូវចំណងចំណូលចិត្តខ្លួនគេដែរស្រលាញ់ខុសដែរមែនតែបើតាមខ្ញុំដឹងហាស់ងំៗសាហាវជាងសាអីទៀតវាច្រើនដងហើយដែរខ្ញុំឮពាក្យដែរបែបនេះ។
ការប្រកាសទទូចស្នើសុំចិត្តមហាជនពីសំណាក់ គង់ សូនីតា ខាងលើនេះធ្វើឡើងស្របពេលមួយរយៈពេលចុងក្រោយនេះគេសង្កេតឃើញថា មានវត្តមានតារាស្រីល្បីឈ្មោះជាច្រើនបានទទួលរងព្រនង់នៃការរិះគន់យ៉ាងចាស់ដៃទៅលើការស្លៀកពាក់ សម្ញែងភាពសិចស៊ីបញ្ចេញសាច់លើក្រោមដូចជា គល់ភ្លៅ និងដើមទ្រូងដោយការចម្លងម៉ូដរបស់បរទេសមក ស្លៀកពាក់ជាបន្តបន្ទាប់នោះ។
តាមការកត់សម្គាល់អំឡុងពេលជិត២ឆ្នាំចុងក្រោយនេះ គេឃើញមានវត្តមានតារាស្រីក្មេងៗ៥ឬ៦រូបបានទទួលរងការរិះគន់ទៅលើការស្លៀកពាក់ស្ទើរងើបមុខមិនរួចដូចជា៖ កញ្ញា ដួង ម៉ានិច កញ្ញា បេននី យ៉ាំងកញ្ញា ដេននី ខ្វាន់កញ្ញា តូតា កញ្ញា សាន សូម៉ាលី និងកញ្ញា វណ្ណ វល័ក្ខ ជាដើម…។ តារាស្រីទាំងនេះធ្លាប់បានរងការរិះគន់យ៉ាងខ្លាំងទៅលើការស្លៀកពាក់សម្ញែងភាពសិចស៊ីបង្ហាញដើមទ្រូងដូចៗគ្នាពីសំណាក់ទស្សនិកជន៕
