ភ្នំពេញ ៖ ឆ្លងតាមរយៈសកម្មភាពមនុស្សធម៌សស្រាក់សស្រាំ និងមិនរើសអើងសុខចិត្តចំណាយពេលវេលា ចុះធ្វើមនុស្សធម៌គ្រប់ច្រកល្ហកមិនថា ចំពោះកុមារ ឬចាស់ជរានោះតារាភាពយន្ត ដែលលេចធ្លោទាំងទីផ្សារសិល្បៈ លោក សាវិន ហ្វីលីព ថ្មីៗនេះក៏បានសរសេរបង្ហោះនៅលើបណ្ដាញសង្គមហ្វេសប៊ុកថា ចុងសប្ដាហ៍នេះ លោកនឹងត្រូវធ្វើដំណើរពីរាជធានីភ្នំពេញឆ្ពោះទៅខេត្តសៀមរាបដើម្បីចែកសម្ភារៈសិក្សាដល់សិស្ស នៅសាលាបឋមសិក្សាស្នាសង្គ្រាម។
លោក សាវិន ហ្វីលីព បានលើកឡើងដូច្នេះថា តើអ្នកធ្លាប់ចែករំលែកសេចក្ដីស្រលាញ់របស់អ្នកដល់កុមារសហគមន៍ហើយ ឬនៅ? បើមិនទាន់ធ្វើទេ អ្នកអាចចូលរួមជាមួយមូលនិធិកុមារយើងបាននៅចុងសប្ដាហ៍នេះយើងនឹងចែកសម្ភារៈសិក្សាឲ្យសិស្សនៅសាលាបឋមសិក្សាស្នាសង្គ្រាម ស្រុកប្រាសាទបាគង ខេត្តសៀមរាប។ ក្រៅពីនេះ ក៏មានរៀបចំកម្មវិធីទទួលទានអាហារ ពេលល្ងាចឲ្យកុមារសហគមន៍ត្រាវកុដ ក្នុងអង្គការសុបិន្ដកុមារកម្ពុជា ដែលជាដៃគូសហការរួមគ្នាជាមួយមូលនិធិកុមារសាវិនកម្ពុជាលើគម្រោង ទឹកស្អាត ដើម្បីកុមារសហគមន៍។
បន្ថែមលើនេះប្រធានមូលនិធិកុមារសាវិនកម្ពុជា លោក សាវិន ហ្វីលីព បានប្រាប់កម្ពុជាថ្មីនាម៉ោង ១០និង៤៥នាទីព្រឹកថ្ងៃទី០៩ ខែមីនា ឆ្នាំ២០១៦ថា លោកពិតជាបានត្រៀមសម្ភារៈសិក្សាយកទៅចែកជូនដល់សិស្សនៅសាលាបឋមសិក្សាស្នាសង្គ្រាមនាចុងសប្ដាហ៍នេះ ហើយក្នុងនោះដែរ លោកក៏បានសាងសង់អណ្ដូងទឹកខ្នាតធំចំនួន២ ដើម្បីប្រគល់ជូនឲ្យសាលាបឋមសិក្សាស្នាសង្គ្រាមមួយ និងមួយទៀតនៅសាលាបឋមសិក្សាទៀបាញ់សែនជ័យ ដែលមានចម្ងាយពីគ្នាប្រមាណដី៦ គីឡូម៉ែត្រ។
លោក សាវិន ហ្វីលីប បានបន្តថា បើគិតរហូតមកទល់ពេលនេះចំនួនអណ្ដូងទឹក ដែលត្រូវបានសាងសង់ដោយមូលនិធិកុមារសាវិនកម្ពុជា មានរហូតដល់១៣៣ អណ្ដូងហើយ។ បន្ទាប់ពីនេះ លោក សាវិន ហ្វីលីព ក៏មានគម្រោងសាងសង់សាលារៀនតូចល្មមមួយនៅក្នុងសហគមន៍ត្រាវកុដ ដើម្បីទទួលបង្រៀនភាសាអង់គ្លេសដោយឥតគិតថ្លៃដល់កុមារនៅក្នុងសហគមន៍ទាំងអស់នាពេលឆាប់ៗខាងមុខនេះផងដេរ។
ជាមួយគ្នានេះ ប្រធានមូលនិធិកុមារសាវិនកម្ពុជា និងជាឯកអគ្គរាជទូតសុឆន្ទៈអង្គការមូលនិធិកុមារ CGF Foundation របស់បារាំង លោក សាវិន ហ្វីលីព បានបន្ថែមថា ខ្ញុំក៏សូមអរគុណបងប្រុស ស៊ាន និងបងស្រី ប៉ុល សុគន្ធី ( Julie ) ម្ចាស់ Angkor Pharmacy និងបងស្រី ពុទ្ធារី និងក្រុមការងារទាំងអស់នៅPennsylvania,USA ដែលខិតខំរៃអង្គាសប្រាស់ និងស្វែងរកជំនួយមកសាងសង់អណ្ដូងទឹកជូនប្រជាពលរដ្ឋ និងកុមារនៅសាលាសាលាបឋមសិក្សាស្នាសង្គ្រាម ស្រុកប្រាសាទបាគង ខេត្តសៀមរាប៕
