ភ្នំពេញ ៖ នៅទីបំផុតឃាតករំលោភសម្លាប់ក្មេងស្រីអាយុ១៥ឆ្នាំ កាលពីថ្ងៃទី៧ ខែកុម្ភៈ នោះ ត្រូវបានសមត្ថកិច្ចចាប់ខ្លួនបានហើយ កាលពីរសៀលថ្ងៃទី២៧ ខែមីនា ឆ្នាំ២០១៦ នៅស្រុកគីរីវង់ ខេត្តតាកែវ។
ប្រភពព័ត៌មានបានឲ្យដឹងថា ឃាតកនោះមានឈ្មោះដាង យ៉ាងឌូ ភេទប្រុស អាយុ២១ឆ្នាំ ជនជាតិវៀតណាម មុខរបរជាងធ្វើតុ ទូ ស្នាក់នៅភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ហើយនៅព្រឹកថ្ងៃទី២៨ ខែមីនា ឆ្នាំ២០១៦នេះ សមត្ថកិច្ចបាននាំខ្លួនជនសង្ស័យរូបនេះមកធ្វើការសាកសួរពាក់ព័ន្ធករណីរំលោភរួចសម្លាប់ក្មេងស្រីម្នាក់អាយុ១៥ឆ្នាំ កាលពីយប់ថ្ងៃ៧ ខែកុម្ភៈ ឆ្នាំ២០១៦ កន្លងទៅ នៅមុខវត្តចាក់អង្រែក្រោម សង្កាត់ចាក់អង្រែក្រោម ខណ្ឌមានជ័យ។
តាមចម្លើយសារភាពរបស់ឃាតក មូលហេតុ ដែលឈានទៅដល់ការរំលោភ រួចសម្លាប់ ដោយសារខឹងជនរងគ្រោះដើរមកបុកវា ហើយជេរស្ដីបន្ទោសវា ទើបវាខឹង ក៏ចាប់ច្របាច់ករំលោភ រួចសម្លាប់ជាក្រោយ។ នៅព្រឹកថ្ងៃដដែលនេះដែរ សមត្ថកិច្ចបាននាំជនសង្ស័យនោះមកធ្វើត្រាប់សកម្មភាពឡើងវិញនៅមាត់ជ្រាំងទន្លេកន្លែងកើតហេតុ។
គួររំលឹកថា កាលពីវេលាម៉ោង១១យប់ ថ្ងៃទី០៧ ខែកុម្ភៈ ឆ្នាំ២០១៦ ប្រជាពលរដ្ឋបានប្រទះឃើញសពក្មេងស្រីម្នាក់ស្លាប់ទាំងអាក្រាតកាយ នៅចំណុចជាប់ច្រាំងទន្លេបាសាក់មុខវត្តចាក់អង្រែក្រោម ស្ថិតក្នុងក្រុម៣៨ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ក្រោយមកទើបគេដឹងថា ក្មេងស្រីនោះមានឈ្មោះស្រីពៅ អាយុ១៥ឆ្នាំ ជាសិស្ស មានស្រុកកំណើត ស្រុកកំចាយមារ ខេត្តព្រៃវែង ហើយបានមកលេងផ្ទះឪពុកមា បានមួយថ្ងៃ ក៏ត្រូវបានឃាតករំលោភ រួចសម្លាប់យកទៅប្លុងចោលតែម្ដង។
ពាក់ព័ន្ធនឹងករណីរំលោភសម្លាប់នេះ នៅមុនពេលកើតហេតុប្រជាពលរដ្ឋបានធ្វើដំណើរទៅកាន់លំនៅឋានជាប់មាត់ច្រាំងទន្លេ ក៏ប្រទះឃើញសពក្មេងស្រីរងគ្រោះនៅជាប់មាត់ច្រាំងទន្លេ ដោយមានអាការៈអាក្រាតកាយពាក់កណ្ដាលខ្លួនចុះក្រោមក្បាល កើយនឹងច្រាំងទន្លេ ជើងចុះទៅក្នុងទន្លេ។ ភ្លាមៗនោះប្រជាពលរដ្ឋក៏បានស្រែកឆោឡោ និងរាយការណ៍ឲ្យសមត្ថកិច្ចចុះមកពិនិត្យ ទើបដឹងថា ក្មេងស្រីរងគ្រោះត្រូវឃាតក រំលោភរួចចាប់ក្បាលច្រមុជទឹកបណ្ដាលឲ្យស្ទះដង្ហើមដាច់ខ្យល់ស្លាប់តែម្តង។
សមត្ថកិច្ចបានឲ្យដឹងថា ជនរងគ្រោះឈ្មោះស្រីពៅបានមកលេងផ្ទះឪពុកមានៅក្បែរចំណុចកើតហេតុបានរយៈពេលពេញមួយថ្ងៃ មុននឹងត្រូវឃាតករំលោភសម្លាប់ ហើយឪពុកមារបស់ក្មេងស្រីរងគ្រោះឈ្មោះយ៉ យុំាងតាយ ភេទប្រុស អាយុ៤៥ឆ្នាំ មានមុខរបរជាកម្មករសំណង់ មានទីលំនៅផ្ទះគ្មានលេខ ក្រុមទី១៣ ភូមិទួលរកា សង្កាត់ចាក់អង្រែក្រោម ខណ្ឌមានជ័យ៕
