ឧកញ៉ានាយកក្រុមហ៊ុនវីតាល់ធានាបញ្ជូនកុមារីកើតជំងឺខួរក្បាលធ្ងន់ធ្ងរម្នាក់ ទៅព្យាបាលនៅថៃ
រាជធានីភ្នំពេញ៖ ក្មេងស្រីអភព្វម្នាក់ឈ្មោះ តីតី ដែលកើតជំងឺខួរក្បាលយ៉ាងធ្ងន់ធ្ងរ ហើយឪពុករបស់គេជាបុគ្គលិកវីតាល់ ត្រូវបានលោកឧកញ៉ា ឡាវ វ៉ាន់ នាយកគ្រប់គ្រងក្រុមហ៊ុន វីតាល់ ធានាចេញថ្លៃព្យាបាលបញ្ជូនទៅព្យាបាលបន្តទៀតនៅប្រទេសថៃ បន្ទាប់ពីការព្យាបាលនៅប្រទេសវៀតណាម មិនសូវផ្ដល់ផលវិជ្ជមាន។
យោងតាមទំព័រ Facebook របស់លោកឧកញ៉ា ឡាវ វ៉ាន់ នាយកគ្រប់គ្រងក្រុមហ៊ុន NVC Corporation ផលិតទឹកបរិសុទ្ធម៉ាក វីតាល់ បានថ្លែងឲ្យដឹងថា៖ គ្រួសារខ្ញុំបន្ទាប់ពីសួរសុខទុក្ខក្មួយ តីតី ផ្ទាល់នៅគេហដ្ឋានរបស់ប្អូន ប៊ុណ្ណារ៉ា នៅម្តុំទឹកថ្លាជាមួយបុគ្គលិកវីតាល់រួចមក គ្រួសារខ្ញុំក៏សម្រេចចិត្តភ្លាមៗ អោយបញ្ជូន តីតី ទៅព្យាបាល បន្តទៀតនៅប្រទេសថៃ បន្ទាប់ពីបានដឹងថា ការព្យាបាលនៅប្រទេសវៀតណាម មិនសូវផ្ដល់ផលវិជ្ជមានដល់ស្ថានភាពជំងឺរបស់ តីតី ព្រោះគ្រូពេទ្យអះអាងថា ជំងឺ តីតី បានពាក់ព័ន្ធខ្លាំងទៅនឹងប្រព័ន្ធខួរក្បាលដ៏សាំញ៉ាំពិបាកព្យាបាលឲ្យមានស្ថានភាពប្រសើរឡើង ហើយយើងនិងជួយទំនុកបម្រុងថ្លៃ ថ្លៃចំណាយចំពោះការព្យាបាល និងចាយវាយទាំងអស់។
ឧកញ៉ា ឡាវ វ៉ាន់ បន្តថា៖ គោលបំណងរួមគ្រួសារខ្ញុំ និងឪពុកគេគឺចង់ឃើញ តីតី ទទួលបានការព្យាបាលបានកាន់តែល្អ គ្រួសារខ្ញុំជាពិសេសឧត្ដមភរិយាខ្ញុំបានកំពុងជួយ ទំនុកបម្រុង រត់ឯកសារ ធ្វើលខិតឆ្លងដែនបន្ទាន់ សម្រាប់ប្អូន គុជ ប៊ុណ្ណារ៉ា និងក្រុមគ្រួសារ ដើម្បីឲ្យពួកគាត់អាចយក តីតី ទៅមន្ទីរពេទ្យល្បីផ្នែកខួរក្បាលមួយទៀត នៅប្រទេសថៃ ពួកយើងសង្ឃឹមថាការបន្តការព្យាបាលនឹង ប្រព្រឹត្តទៅក្នុងពេលឆាប់ៗ។សូមរម្លឹកថា កាលពីពេលកន្លងមក លោកឧកញ៉ា ឌួង ឆាយ ក៏ធ្លាប់បានប្រកាសស្វែងរកអត្តសញ្ញាណឪពុករបស់កុមារីរងគ្រោះនេះផងដែរ ដែលបានអះអាងថា ក្មេងស្រីរូបនោះមានកើតជំងឺរលាកខួរក្បាលកម្រិតធ្ងន់ ដោយពិការទាំងដៃជើង និងបានបាត់បង់សតិទៀតផង៕
