រាជធានីភ្នំពេញ ៖ នារីម្នាក់ត្រូវបានក្រុមចោរភ្ជង់ប្លន់យកម៉ូតូជិះទៅបាត់ ក្រោយពីនាងត្រឡប់មកពីធ្វើការវិញមកដល់មុខផ្ទះ កំពុងគោះទ្វារហៅបងស្រី។ ករណីនេះ បានកើតឡើង កាលពីវេលាម៉ោង៣និង២០ ទៀបភ្លឺ ថ្ងៃទី២៧ ខែកុម្ភះ នៅមុខផ្ទះលេខ៧ ផ្លូវលេខ២៦៥ សង្កាត់ទឹកល្អក់៣ ខណ្ឌទួលគោក។
តាមសម្តីរបស់នារី រងគ្រោះដែលជាបុគ្គលិកហាងខារ៉ាអូខេមួយបាននិយាយថា មុនពេលកើតហេតុ នាងបានចេញពីធ្វើការ ដោយជិះម៉ូតូម៉ាក Scoopy ស៊េរីឆ្នាំ២០១៥ ពណ៌បៃតង ពាក់ស្លាកលេខ ភ្នំពេញ 1CA-4994 ។ លុះមកដល់មុខផ្ទះ នាងក៏អង្គុយរង់ចាំឲ្យបងស្រីបើកទ្វាផ្ទះឲ្យ តែភ្លាមនោះ ក៏ស្រាប់តែមានជនសង្ស័យពីរនាក់មិនដឹងចេញពីណា ក៏ដើរមកជិត ហើយយកដំបងគំរាមឲ្យនាងប្រគល់ម៉ូតូឲ្យគេ។ ដោយឃើញស្ថានភាពបែបនេះជនរងគ្រោះ ក៏ព្រមប្រគល់ម៉ូតូឲ្យទៅក្រុមចោរនោះជិះចេញទៅបាត់តែម្តង៕
