ខេត្តកំពត ៖ អាកប្បកិរិយារបស់កូនកំលោះដែលមិនអាចអត់ទ្រាំបាន ទីបំផុតមេបាខាងកូនក្រមុំបានបណ្ដេញ កូនកំលោះចេញពីរោងការ មិនស្ដាយស្រណោះចំពោះកូនស្រីមានឈ្មោះ មេម៉ាយខាន់ស្លាឡើយ ព្រោះថាបើបណ្ដែតបណ្ដោយនោះ កាន់តែខូចការធ្ងន់ធ្ងរប្រចាំជីវិតគ្រួសារមិនខាន ។
ទាក់ទិននឹងរឿងរ៉ាវខាងលើ ពិធីមង្គលការនេះបានប្រារព្ធធ្វើកាលពីថ្ងៃទី៩ មីនា ត្រូវនឹងថ្ងៃ២កើត ខែផល្គុន ស្ថិតនៅភូមិក្រាំងដូង ឃុំសំរោងក្រោម ស្រុកបន្ទាយមាស ។ ក្នុងពិធីដែលភ្ញៀវមកចូលរួមប្រមាណ៤០០នាក់នោះ គឺកូនក្រមុំឈ្មោះ លី ស្រីមុំ អាយុ២៣ឆ្នាំ នៅភូមិក្រាំងដូង ជាគូនិងកូនកំលោះឈ្មោះ លឿង ពៅ អាយុ៣២ឆ្នាំ ទីលំនៅមិនពិតប្រាកដ បើតាមដឹងខ្លះៗថា ស្នាក់នៅម្ដុំផ្សារធំថ្មីក្នុងរាជធានីភ្នំពេញ ។ ពិធីមង្គលការបានរៀបចំតាមលំដាប់លំដោយ មានហែជំនូនរបាំផ្លែឈើ កាត់សក់ និងសំពះផ្ទឹម ។
តាំងពីព្រឹកព្រលឹមមកម្ល៉េះ អាកប្បកិរិយាកូនកំលោះហាក់មានភាពច្រង៉េងច្រង៉ាងមិនស័ក្ដិសមក្នុងថ្ងៃមង្គលការរបស់ខ្លួនឡើយ សង្ស័យមនុស្សបែកថ្នាំញៀន ។ ឥរិយាបថទទឹងទិសនេះ ត្រូវបានក្រុមសាច់ញាតិខាងកូនក្រមុំអត់ធ្មត់បំផុតព្រោះខ្លាចខ្មាស់គេ ។
ភាពមិនត្រឹមត្រូវរបស់កូនកំលោះ គឺផឹកស្រាសអស់មួយកែវ ហើយថែមមួយកែវទៀត។ សូម្បីតែដោះសំលៀកបំពាក់សំអាងការដែលតុបតែងក្នុងនាមជាកូនកំលោះ ក៏គ្រវែងចោលទីណាត់ទីណែង និងទាញដងកាមេរ៉ារបស់អ្នកថតរូបក្រវាត់ក្រវែង យកកៅអីចោលទៅលើគេឯង រហូតភ្ញៀវខ្លះភ័យខ្លាច ឥរិយាបថកូនកំលោះ ក៏បានគេចចេញពីរោងការបណ្ដើរៗ ។ ដោយសារតែចរិកអន់របស់កូនកំលោះ ដែលបង្កឱ្យមានភាពច្របូកច្របល់នោះ ភ្ញៀវខាងកូនក្រមុំខ្លះ ដែលទ្រាំលែងបាន ក៏ប្រវាយប្រតប់ជាមួយកូនកំលោះ ។ ដោយសារតែផ្ទុះហិង្សាបែបនេះ កូនកំលោះប្រមឹកថ្ងៃចូលរោងការបានទាញខ្សែកដែលមានទម្ងន់៣ជីកន្លះ ហើយហៅកូនក្រមុំមកចែកគ្នាស្មើភ្លាមៗក្នុងរោងការ មើលទៅហាក់ដូចជាអគតិពេក ។ ចំណែកម្ដាយកូនកំលោះដែលពិការភ្នែកទាំង២ ក៏ទាមទារឱ្យម្ដាយកូនក្រមុំសងប្រាក់វិញភ្លាមៗចំនួន១.៦០០ដុល្លារ ព្រោះបណ្ណាការនេះខាងប្រុសបានប្រគល់ប្រាក់ជូយខាងស្រីផ្ដាច់៣.២០០ដុល្លារ ។ ប៉ុន្តែការទាមទារនោះមិនបានទេ ដោយខាងស្រីបានចាត់ចែងអស់ទៅហើយ ។ ទោះជាមិនបានប្រាក់ពីខាងស្រីក្ដី ក្រុមសាច់ញាតិខាងកូនកំលោះ២-៣នាក់ រួមទាំងម្ដាយពិការភ្នែកផងនោះ បានឡើងរថយន្តឈ្នួលត្រឡប់ទៅភ្នំពេញវិញ ដោយមិនទាន់បានពិសាភោជនាអាហារផង ។ រីឯកូនកំលោះស្រវឹងក៏ត្រូវបានបណ្ដេញចេញពីរោងការ ទៅដេកលើអង្រឹងនៅផ្ទះអ្នកភូមិឆ្ងាយពីរោងការ ។ លុះដល់វេលាល្ងាចជាពេលទទួលភ្ញៀវ គេឃើញតែនាងជាកូនក្រមុំម្នាក់ឯងដែលឈរទទួលភ្ញៀវ ។
អ្នកស្រី សួន អេម ជាម្ដាយកូនក្រមុំបាននិយាយថា ពិធីមង្គលការកូនស្រីគាត់បានហៅភ្ញៀវតែ៣០តុទេ ប៉ុន្តែវាហួសចិត្តត្រង់ថា កូនប្រសាប្រុសគាត់ អុកឡុករហូតស្រែកឡូឡា ហាមកូនស្រីគាត់មិនឱ្យចុះពីលើផ្ទះ និងប្រមាថជេរគេ ជេរឯង ទាមទារអ្វីៗគ្រប់យ៉ាង។ អ្នកស្រី សួន អេម និយាយថា គាត់ខ្មាស់គេណាស់ មានកូនប្រសាប្រុសបែបនេះត្រូវតែបណ្ដេញចេញពីរោងការ ។
ទោះជាកូនកំលោះមិនបានមកបង្កផ្សេងទៀតក៏ដោយ នៅវេលាព្រឹកថ្ងៃទី១០ មីនា អ្នកស្រី សួន អេម និងនាង លី ស្រីមុំ ជាកូនក្រមុំរួមទាំងឈ្មោះ លឿង ពៅ ជាកូនកំលោះ បាននាំគ្នាទៅសាលាឃុំសំរោងក្រោម ។ ស្ដ្រីម្ដាយក្មេកបានប្ដឹងលោកមេឃុំថា ខ្លួនមិនទទួលឈ្មោះ លឿង ពៅ ជាកូនប្រសាតទៅទៀតទេ។ ចំណែកកូនប្រសាទាមទារយកម៉ូតូ១គ្រឿងវិញ ជិះទៅភ្នំពេញ ។ ការទាមទារនោះ អ្នកស្រីជាម្ដាយក្មេកខកចិត្ត ក៏បានព្រមឱ្យម៉ូតូទៅកូនប្រសា ប៉ុន្តែបានឱ្យផ្ដិតមេដៃឈប់ចូលផ្ទះគាត់ ប៉ុន្តែឈ្មោះ លឿង ពៅ មិនព្រមធ្វើតាមកិច្ចសន្យាទេ ។ ដោយសារតែការមិនចុះសំរុងគ្នានេះ បន្ទាប់ពីរៀបមង្គលការហើយក្លាយជាទទេស្អាតបែបនេះឈ្មោះ លឿង ពៅ ក៏មិនបានត្រឡប់មកភ្នំពេញវិញដែរ គឺនៅសម្ងំផ្ទះអ្នកភូមិ ប៉ុន្តែមិនហ៊ានទៅផ្ទះកូនក្រមុំទេ ។
លោក ច្រឹង ចេង អនុប្រធានភូមិក្រាំងដូង និយាយថា ពិធីមង្គលការនេះខាងប្រុសមិនមានឯកសារអ្វីបញ្ជាក់ថា នៅលីវ និងនៅទីណាឱ្យច្បាស់លាស់នោះ លោកមេឃុំសំរោងក្រោម កឹម លន់ មិនហា៊នចេញសំបុត្ររៀបអាពាហ៍ពិពាហ៍ឱ្យដែរ តែបើរៀបចំមង្គលការបានសុខក៏សុខទៅ តែបើមានរឿងអ្វីនោះ គាត់មិនទទួលខុសត្រូវទេ ។ លោកអនុប្រធានភូមិក្រាំងដូង និយាយថា កូនកំលោះនោះហាក់ដូចជាមនុស្សខុសប្រក្រតី សូម្បីតែជិះម៉ូតូក៏លើកដៃលើកជើងដែរ ។ លោក ច្រឹង ចេង បានប្រាប់ថា នាងជាកូនក្រមុំបានបដិសេធ មិនយកឈ្មោះនោះជាប្ដីនោះទេ ។
ប្រភពព័ត៌មានបានឱ្យដឹងថា ការជួបគ្នារហូតមានការព្រមព្រៀងចូលរោងការនេះ គឺនាងកូនក្រមុំមកធ្វើការរកស៊ីនៅរាជធានីភ្នំពេញ ទើបបានជួបនិងឈ្មោះ លឿង ពៅ ក៏បង្កើតបានជាចំណងអាពាហ៍ពិពាហ៍ គ្រាន់តែបង្អើលរុយតែប៉ុណ្ណោះ គួរឱ្យខ្មាស់ដល់ញាតិមិត្តក្នុងស្រុកភូមិពន់ពេករកងើបមុខមិនរួច ៕
