សិល្បៈ៖ តារាចម្រៀងនិពន្ធបទ Original Song ច្រៀងដោយខ្លួនឯង អ៊ាម វន្នី បានចាកចេញពីមាតុប្រទេសទៅកាន់ទឹកដីអាមេរិកនៃរដ្ឋមុនីសូតា កាលពីថ្ងៃទី១៦ ខែមីនា កន្លងទៅថ្មីៗនេះ តាមរយៈការស្នើសុំរបស់អង្គការសមាគមបងប្អូនខ្មែរដែលរស់នៅលើទឹកដីនោះ ដែលជាដំណើរលើកទី១ សម្រាប់តារារូបនេះ មានឱកាសបង្ហាញសមត្ថភាព និងទេពកោសល្យរបស់ខ្លួនឯង ដើម្បីវាយលុកលើទីផ្សារសិល្បៈកាន់តែខ្លាំងផងដែរ ប៉ុន្តែមកដល់រសៀលថ្ងៃទី២១នេះ អ៊ាម វន្នី បានថ្លែងមកកាន់ Kqube.NET ថា លោកពិតជានឹកស្មានមិនដល់ថា មានអ្នកគាំទ្រសមត្ថភាពរបស់លោកខ្លាំងដល់ម្ល៉ឹងទេ។
តារាចម្រៀងថ្មីស្រឡាងរូបនេះបានបន្តថា កាលពីយប់ថ្ងៃទី១៩ ម្សិលម្ង៉ៃនេះ មានការប្រគំតន្ត្រី Shakopee Ballroom នៃរដ្ឋមុនីសូតា ដែលជាយប់ទី១ សម្រាប់ការបង្ហាញសមត្ថភាពរបស់លោកនោះ គឺមានអ្នកមកគាំទ្ររហូត ៣៤០នាក់ ខណៈកម្មវិធីប្រគំតន្ត្រីនៅទីនោះសព្វមួយដង មានភ្ញៀវចូលរួមត្រឹមតែ ២០០នាក់ប៉ុណ្ណោះ។ នេះបើតាមទិន្នន័យដែលលោកទទួលបានពីអ្នករៀបចំកម្មវិធីផ្ទាល់ ហើយចំណុចដែលពិសេសនោះ គឺមានអ្នកជិះរថយន្តចម្ងាយ ១២០គីឡូម៉ែត្រមកគាំទ្រលោកផ្ទាល់។លោក អ៊ាម វន្នី បានបន្តថា នៅក្នុងការប្រគំតន្ត្រីនោះ គឺមានការគាំទ្រយ៉ាងខ្លាំងពីសំណាក់បងប្អូន ដែលបានអញ្ជើញចូលរួមក្នុងកម្មវិធីនោះផ្ទាល់ ប៉ុន្តែចំណុចដែលលោកបានកត់សម្គាល់ជាងគេនោះ គឺពួកគាត់មានការគាំទ្របទចម្រៀងស្នាដៃនិពន្ធថ្មីរបស់លោកចំនួនពីរបទ គឺបទ"ស្អប់ស្នេហ៍ដំបូង" និងបទ"ខ្ញុំជាអ្នកខេត្តបាត់ដំបង"តែម្ដង ព្រោះលោកបានបញ្ជាក់ថា លោកបានដឹងតាមការជួបសំណេះសំណាលជាមួយអ្នកគាំទ្រដោយផ្ទាល់នៅខាងក្រៅកម្មវិធី។
តែយ៉ាងណាមិញ តារាចម្រៀងល្បីឈ្មោះ ដែលកំពុងជោគជ័យក្នុងបេសកកម្ម លើទឹកដីអាមេរិករូបនេះ បានប្រាប់ Kqube.NET ដែរថា មកដល់ពេលនេះ លោកនៅមិនទាន់ស៊ាំជាមួយអាកាសធាតុនៅទីនោះនៅឡើយទេ ព្រោះថា សីតុណ្ហភាពធ្លាក់រហូត ១០អង្សាឯណោះ គឺអាកាសធាតុត្រជាក់ខ្លាំង ម្យ៉ាងទៀតចំណីអាហារមួយចំនួន ក៏មិនទាន់ស៊ាំដែរ គឺហូបមិនបានច្រើន ហើយក្នុងនោះដែរ អ្វីដែលមិនទាន់ស៊ាំខ្លាំង គឺពេលវេលា នៅស្រុកអាមេរិក នឹងកម្ពុជាតែម្ដង ព្រោះយប់នៅស្រុកគេលោកពិបាកគេងឲ្យលក់ណាស់៕
