ខេត្តកណ្ដាល៖ បុរសម្នាក់បានបើកបររថយន្ត១គ្រឿងទាំងកល់កំណល់ បណ្ដាលឲ្យកោសដាច់កៅស៊ូខូចខាតស្ពានអ្នកលឿងទៀតហើយ ប្រហែល៣៥ម៉ែត្រ កាលថ្ងៃទី២៨ ខែកុម្ភៈ ឆ្នាំ២០១៦ វេលាម៉ោង១៧និង៣៥នាទីល្ងាច៕
រថយន្តធុនធំបង្កឲ្យខូចខាតស្ពានខាងលើ មានម៉ាកហ៊ីយ៉ានដាយ ពាក់ស្លាកលេខ កំពង់ចាម 3A0264 ដឹកត្រីចំនួនប្រហែល១០តោន បើកបរដោយឈ្មោះ ហេង ប៊ុនថង ភេទប្រុស ឆ្នាំកំណើត ១៩៨៥ រស់នៅភូមិបាទី ឃុំពាមរក៍ ស្រុកពាមរក៍ ខេត្តព្រៃវែង។
យោងតាមប្រភពពីអគ្គស្នងការដ្ឋាននគរបាលជាតិ បានឲ្យដឹងថា នៅលើស្ពានត្សឹបាសា កាលថ្ងៃទី២៨ ខែកុម្ភៈ ឆ្នាំ២០១៦ វេលាម៉ោង១៧និង៣៥នាទី មានរថយន្ត១គ្រឿងបើកដាច់កៅស៊ូក្រាលថ្នល់ដុំៗ ប្រវែងប្រហែល៣៥ម៉ែត្រ ចំណែករថយន្តនិងអ្នកបើកបរបានឃាត់យកមកអធិការ នគរបាលស្រុកលើកដែក រង់ចាំចាត់ការតាមនីតិវិធី។
សមត្ថកិច្ចបញ្ជាក់ថា ការខូចខាតនេះ គឺបណ្ដាលមកពីកំណល់រថយន្តជាប់ចន្លោះកង់ក្រោយ ពេលគេកល់ហើយអ្នកបើកបរបើកទាំងជាប់កំណល់ ទើបធ្វើឲ្យកំណល់កាប់ដាច់កៅស៊ូក្រាលលើស្ពាន ប្រហែល៣៥ម៉ែត្រដូចនេះ។
សូមរម្លឹកថា កាលពីវេលាទៀបភ្លឺថ្ងៃទី២២ កុម្ភៈ ឆ្នាំ ២០១៦ កន្លងមក ស្ពានអ្នកលឿង (ស្ពានស៊ូបាសា) បានរងការខូចខាតម្ដងរួចទៅហើយ ដោយសារតែរថយន្តយីឌុបដឹកអង្ករជាង៧០តោនលើសចំណុះមួយគ្រឿង បើកបរឆ្លងកាត់ហើយឡើងស្ពានមិនរួច ក៏រអិលថយក្រោយវិញ បានបំផ្លាញសាច់កៅស៊ូលើស្ពាន៕
