ខឹងប្រើឱ្យទៅមើលចម្ការបែរជាទៅផឹក មកវិញស្រវឹងដេកអង្រឹង ប្រពន្ធដាំទឹកក្ដៅជះរលាកពេញខ្លួន
ខេត្តស្ទឹងត្រែង ៖ បុរសម្នាក់បានរងរបួសរលាកពេញខ្លួន ដោយសារប្រពន្ធបានយកទឹកក្តៅដែលកំពុងដាំពុះ ទៅចាក់ស្រោចពីលើ ខណៈដែលរូបគាត់កំពុងដេកយោលអង្រឹង។ហេតុការណ៍នោះ បានកើតឡើងកាលពីថ្ងៃទី១៩ ខែមីនា ឆ្នាំ២០១៦ ស្ថិតក្នុងភូមិទាល់ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង។ជនរងគ្រោះឈ្មោះ សោម សិទ្ធិ អាយុ៣៣ឆ្នាំ ចំណែកប្រពន្ធឈ្មោះ ស្រីមុំ អាយុ៣២ឆ្នាំ ទាំង២នាក់រស់នៅក្នុងភូមិ ឃុំកើតហេតុ។
ប្រភពព័ត៌មានបានឱ្យដឹងថា រឿងហេតុពីដំបូងកាលពីថ្ងៃទី១៨ ខែមីនា ឆ្នាំ២០១៦ ប្រពន្ធបានប្រើប្តី ឱ្យទៅមើលដីចម្ការ។ ក្រោយពីបាត់ដំណឹងប្តី អស់ជាងកន្លះថ្ងៃ មិនឃើញវិលត្រឡប់មកផ្ទះវិញ ប្រពន្ធឆ្ងល់ក៏ទូរស័ព្ទ តែមិនអាចទាក់ទងបាន។ដោយមិនអស់ចិត្តនៅរសៀលថ្ងៃដដែលនោះ ប្រពន្ធឈ្មោះ ស្រីមុំ បានទូរស័ព្ទទៅកាន់ឱពុកក្មេក។ ពេលនោះឪពុកបានប្រាប់ថា “ប្តីឯងកំពុងផឹកស៊ីជាមួយអ្នកភូមិមិនទាន់ទៅផ្ទះវិញទេ។” ក្រោយមក ក៏ទូរស័ព្ទទៅប្តីជាច្រើនដងទៀតតែប្តីមិនព្រមទទួលទូរស័ព្ទឆ្លើយតបសោះ ទើបធ្វើឱ្យប្រពន្ធខឹងក្នុងចិត្តជាខ្លាំង។ប្រភពដដែលបន្ដថា លុះពេលប្តីមកដល់ផ្ទះវិញ នៅពេលរំលងអធ្រាត្រស្ត្រីជាប្រពន្ធក៏សួរប្តីថា “ឯងទៅណាបាត់មួយថ្ងៃ ទូរស័ព្ទក៏មិនលើក យប់ថ្មើនេះហើយទើបមកផ្ទះវិញ (វេលាម៉ោង៣ទាបភ្លឺ)”។ ភ្លាមៗនោះ ប្តីមិនបានឆ្លើយតបទៅនឹងសំណួរប្រពន្ធវិញទេ។
ប្រភពបានបញ្ជាក់ឱ្យដឹងថា មុនពេលប្តីមកដល់ផ្ទះប្រពន្ធបានដាំទឹកក្តៅឱ្យពុះរង់ចាំប្តីរួចជាស្រេចហើយ ដើម្បីចាក់ស្រោចលើប្តី។ បន្ទាប់ពីប្រពន្ធសួរប្តីមិនឆ្លើយតប។លុះក្រោយមកមួយសន្ទុះ ប្តីកំពុងស្រវឹងផងចាប់ផ្តើមសួរទៅប្រពន្ធវិញថា “អូនដាំទឹកធ្វើអី?” ប្រពន្ធបានឆ្លើយតបវិញភ្លាមថា “ដាំទឹកទុកចាក់អាឆ្កែដើរមិនចូលផ្ទះ”។ ពេលប្រពន្ធឆ្លើយបែបនេះ ប្តីមិនបានចាប់អារម្មណ៍ឡើយក៏ដើរទៅដេកក្នុងអង្រឹង។ ពេលប្តីកំពុងដេកនៅក្នុងអង្រឹងប្រពន្ធក៏យកទឹកក្តៅទៅចាក់ស្រោចពីលើប្តីតែម្តង ក៏បង្កឱ្យមានការភ្ញាក់ផ្អើលដល់អ្នកជិតខាង ដឹកទៅកាន់មន្ទីរពេទ្យខេត្តស្ទឹងត្រែង។ដោយសារស្ថានភាពជំងឺធ្ងន់ធ្ងរសាច់ញាតិបានបញ្ជូនជនរងគ្រោះបន្តទៅ សម្រាកព្យាបាលនៅក្នុងមន្ទីរពេទ្យទីក្រុងភ្នំពេញ។ ចំណែកស្ត្រីជាប្រពន្ធត្រូវសមត្ថកិច្ចឃាត់ខ្លួនបញ្ជូនសំណុំរឿងទៅកាន់ សាលាដំបូងខេត្តស្ទឹងត្រែង។សមត្ថកិច្ចបានបញ្ជាក់នៅ ថ្ងៃទី២០ខែមីនាថាបុរសជាប្តីកំពុងព្យាបាលនៅក្នុងមន្ទីរពេទ្យ។ ឯស្ដ្រីជាប្រពន្ធត្រូវសមត្ថកិច្ចឃាត់ខ្លួនមិនបានប្តឹងផ្តល់អ្វីនោះទេ។ រឿងនេះ ទុកឱ្យខាងតុលាការជាអ្នកសម្រេចទៅចុះ។ ករណីនេះ អាចបណ្តាលមកពីប្រពន្ធប្រចណ្ឌប្តី៕
