មនុស្សជាច្រើនកំពុងប្រឈមមុខនឹងបញ្ហានេះ។ មុនជាបញ្ហាស្បែកដែលធ្វើឲ្យប៉ះពាល់ដល់អារម្មណ៍របស់អ្នក។ មុនជាអាការៈរលាកស្បែកដែលបណ្តាលមកពីក្រពេញសេប៊ូម ឬជាតិខ្លាញ់ឆ្លងមេរោគបាក់តេរី។ នៅពេលបរិមាណសេប៊ូមខុសប្រក្រតី, មុននឹងកើតឡើង។ វាអាចកើតឡើងនៅលើផ្ទៃមុខ, ខ្នង, ក។
មូលហេតុដែលធ្វើឲ្យកើតមុន
មានកត្តាមួយចំនួនដែលធ្វើឲ្យកើតមុនទៅលើអ្នកណាម្នាក់។ តែទោះបីជាយ៉ាងណា មានមូលហេតុទូទៅមួយចំនួនដូចជា៖
- ការកកើតឡើងនៃកោសិកាស្បែកងាប់
- ការលូតលាស់របស់បាក់តេរី
- អ្នកដែលងាយប្រតិកម្មនឹងអរម៉ូនតេសតូស្តេរ៉ូន
- ការទទួលទានអាហារប្រចាំថ្ងៃដែលមានជាតិស្ករខ្ពស់
- ការទុកម្សៅលើផ្ទៃមុខយូរ
- ភាពតានតឹង
- ការប៉ះ ឬត្រដុសស្បែកញឹកញាប់
ខាងក្រោមនេះវិធីមួយចំនួនជួយបំបាត់មុន៖
១. ទឹកកក
ទឹកកកអាចជួយកាត់បន្ថយភាពក្រហម និងហើម ហើយក៏អាចជួយពង្រឹងដល់លំហូរឈាមជុំវិញតំបន់កើតមុនផងដែរ។ វាក៏អាចជួយរឹតបន្តឹងប្រហោងស្បែក និងកម្ចាត់ធាតុកខ្វក់ ជាតិខ្លាញ់នៅលើស្បែក។
យកដុំទឹកកក ឬទឹកកកម៉ត់ ខ្ចប់វាក្នុងក្រណាត់មួយ ហើយដាក់ត្រង់កន្លែងកើតមុន។ រង់ចាំរយៈពេល ២-៣នាទី។
២. ក្រូចឆ្មា
ក្រូចឆ្មាអាចជួយកម្ចាត់មុនបានឆាប់រហ័សបំផុត។ ក្រូចឆ្មាសម្បូរទៅដោយវីតាមីន C ដែលអាចជួយបំបាត់មុន។
អ្នកត្រូវមាន៖
- ទឹកក្រូចឆ្មា ១ស្លាបព្រាបាយ
- សំឡីកប្បាសស្អាតមួយដុំ
- ម្សៅដើមយីហ៊ុប ១ស្លាបព្រាកាហ្វេ
- ទឹកក្តៅឧណ្ហៗ
យកសំឡីកប្បាសដាក់ត្រាំក្នុងទឹកក្រូចឆ្មា រួចជូតត្រង់កន្លែងកើតមុន មុនពេលចូលគេង។ លើសពីនេះទៀត អ្នកអាចលាយទឹកក្រូចឆ្មា ១ស្លាបព្រាបាយជាមួយនឹងម្សៅដើមយីហ៊ុប ១ស្លាបព្រាកាហ្វេ។ លាបវាលើមុនរបស់អ្នក ហើយទុកចោលពេញមួយយប់។ ពេលព្រឹកលាងសម្អាតវានឹងទឹកក្តៅឧណ្ហៗ។
៣. ថ្នាំដុសធ្មេញ
ថ្នាំដុសធ្មេញមានផ្ទុកនូវសារធាតុប្រឆាំងនឹងបាក់តេរីដែលអាចជួយកម្ចាត់មុនបាន។ អ្នកត្រូវមានថ្នាំដុសធ្មេញបន្តិច រួចលាបលើមុន ហើយទុករយៈពេលពេញមួយយប់។ អ្នកអាចប្រើវានៅពេលថ្ងៃក៏បាន តែរង់ចាំរយៈពេលត្រឹមតែ ៣០នាទីប៉ុណ្ណោះ។
៤. ស្លឹកជីក្រហម
ស្លឹកជីក្រហមត្រូវបានគេយកមកប្រើតាំងពីយូរណាស់មកហើយដើម្បីបំបាត់មុន។ សារធាតុរាវដែលចម្រាញ់ចេញពីស្លឹកជីក្រហមអាចជួយកម្ចាត់មុនបានយ៉ាងឆាប់រហ័ស។ វាជាឱសថបំបាត់មុនក្នុងរយៈពេលត្រឹមមួយយប់ និងធ្វើឲ្យស្បែកអ្នកស្អាត។
អ្នកត្រូវមាន៖
- ស្លឹកជីក្រហម
- ទឹកក្រៅ
- សំឡីកប្បាសមួយដុំ
ដំបូងអ្នកត្រូវដាក់ស្លឹកជីក្រហម ២-៣សន្លឹកក្នុងទឹកក្តៅឧណ្ហៗ។ រង់ចាំរយៈពេល ២០នាទី។ រួចយកវាលាងសម្អាតស្បែក និងរង់ចាំរយៈពេលពេញមួយយប់។ ពេលព្រឹកឡើង លាងសម្អាតស្បែកនឹងទឹកធម្មតា។
៥. សំបកក្រូច និងទឹកក្រូច
កម្រិតវីតាមីន Cអាចជួយកម្ចាត់មុន។ នេះជាហេតុធ្វើឲ្យក្រូចជាឱសថដ៏សក្តិសិទ្ធិជួយបំបាត់មុន។ ក្រូចមានផ្ទុកនូវអាស៊ីតធម្មជាតិដែលជួយកម្ចាត់មុនបានយ៉ាងមានប្រសិទ្ធិភាព។
អ្នកត្រូវមាន៖
- ស្លឹកក្រូច
- ទឹកក្រូច
- សំឡីកប្បាស
លាងសម្អាតដៃ និងផ្ទៃមុខរបស់អ្នកដោយប្រុងប្រយ័ត្ន។ យកសំបកក្រូចជូតថ្នមៗលើមុន។ ប្រើសំបកក្រូចផ្សេងៗពីគ្នាជូតលើមុននីមួយៗ ដើម្បីចៀសវាងការឆ្លងបាក់តេរី។ ជ្រលក់ក្រណាត់កប្បាសក្នុងទឹកក្រូច រួចជូតថ្នមៗលើតំបន់កើតមុន។ ផ្លាស់ប្តូរក្រណាត់កប្បាសពេលជូតមុននីមួយៗ ដើម្បីការពារពីការរាតត្បាតនៃការឆ្លងមេរោគបាក់តេរី៕
