សិល្បៈ៖ លោក Phap គឺជាតារាសម្ដែងម្នាក់ទុកសក់វែង ដែលកម្រមានតារារូបណាលេងស្តាយ៍ដូចលោកណាស់។ មូលហេតុនៃការលេងស្តាយ៍សក់វែងនេះ Phap ក៏មិនដែលបានប្រាប់ពីមុនមកឡើយ ទើបតែនៅពេលនេះ លោកបានចេញសារនៅលើកហ្វេសប៊ុកប្រាប់មូលហេតុថា “ថ្ងៃនេះលោកសុំនិយាយរឿងក្នុងចិត្តថា មូលហេតុដែលលោកទុកសក់វែង ព្រោះលោកសង្ឃឹមថា នៅថ្ងៃណាមួយ ប្រទេសខ្មែរនឹងមានថតរឿងអង្គុលីមារ និងរឿង ឃុនឆាង ឃុនថែន ឡើងវិញ ដើម្បីឱ្យកូនខ្មែរបានយល់ និងបានដឹងពីប្រវត្តិសាស្ត្រខ្មែរ”។
ស្របគ្នានឹងការបញ្ចេញសារនេះពេលអ្នកយកព័ត៌មាន Kqube.NET សួរនាំបន្ថែមលោក Phap បានប្រាប់ថា មូលហេតុដែលលោកទុកសក់វែងដូច្នេះ ក្រៅពីមានបំណងដូចលោកបញ្ជាក់ក្នុងសារខាងលើ លោកក៏មានគម្រោងកាត់ចេញដែរ ប៉ុន្តែការកាត់សក់របស់លោកនេះ ត្រូវធ្វើឡើងដោយមានហេតុផលមួយ គឺកាត់នៅពេលអាជីពសិល្បៈរបស់លោកទទួលបានជោគជ័យខ្លាំង ហើយពេលដែលលោកកាត់សក់ គឺកោរបួសជាព្រះសង្ឃសងគុណឪពុកម្ដាយតែម្ដង។ ប៉ុន្តែពេលវេលានោះលោក Phap មិនទាន់បញ្ជាក់ច្បាស់ទេ ដោយលោកសំអាងថា នៅពេលនេះប្រជាប្រិយភាពរបស់លោកនៅមិនទាន់ល្បីដល់កម្រិតដែលលោកស្កប់ចិត្តនៅឡើយ៕
