រាជធានីភ្នំពេញ ៖ យុវជនម្នាក់ឈ្មោះ វ៉ិច ទ័រ អាយុជាង២០ឆ្នាំ បានរងរបួសធ្ងន់ធ្ងរដោយសារគ្រោះថ្នាក់ចរាចរណ៍រថយន្តបុកម៉ូតូ ។
ឧបទ្ទវហេតុនេះ បានកើតឡើងនៅវេលាម៉ោង ជាង៣រសៀលថ្ងៃទី០៣ មេសា ២០១៦ នៅតាមបណ្តោយផ្លូវជាតិលេខ៤ កែងផ្លូវទំនប់កប់ស្រូវ ស្ថិតក្នុងភូមិព្រៃស្វាយ សង្កាត់ចោមចៅ ខណ្ឌពោធិសែនជ័យ ។
បើតាមអ្នកឆ្លើយឆ្លង ព័ត៌មានកោះសន្តិភាព បានឲ្យដឹងជំហានដំបូង មកទៀតថា មុនពេលកើតហេតុ សាក្សីបានឃើញ រថយន្តកូរ៉េមួយគ្រឿង ម៉ាកហ៊ីយ៉ាន់ដាយ ពាក់ស្លាកលេខភ្នំពេញ 2AH 9454 បើកបរដោយបុរសជនជាតិចិនម្នាក់ ដោយបើកក្នុងទិសដៅពីកើតទៅលិច ហើយបានជែងរថយន្តមួយគ្រឿងទៀត បើកស្របទិសដៅគ្នា ក៍ជ្រុលចូលផ្លូវម្ខាងទៀត ទៅបុកម៉ូតូជនរងគ្រោះ ដែលកំពុងជិះម៉ូតូម្នាក់ឯង ម៉ាកC125 ស៊េរីឆ្នាំ២០១៤ ព៌ណខ្មៅ បណ្តាលជនរងគ្រោះឈ្មោះ វ៉ិច ទ័រ រងរបួសធ្ងន់ ដែលតាមសមត្ថកិច្ចថា មានសង្ឃឹមរស់តិចបំផុត ។
នៅពេលនេះ ជនរងគ្រោះកំពុងសង្រ្គោះបន្ទាន់នៅមន្ទីរពេទ្យ ចំណែកអ្នកបើកបររថយន្តជនជាតិចិនមិនទាន់ស្គាល់អត្តសញ្ញាណ និងរថយន្តព្រមទំាងម៉ូតូបានត្រូវសមត្ថកិច្ចនំាយកទៅរក្សាទុក នៅប៉ុស្តិ៍នគរបាលរដ្ឋបាល សង្កាត់ចោមចៅ រង់ចំាដោះស្រាយតាមច្បាប់ ។ សេចក្តីរាយការណ៍ចុងក្រោយ បានឲ្យដឹងថា ជនរងគ្រោះបានស្លាប់ហើយ ៕
