ប្រទេសកូរ៉េខាងជើងបានប្រកាសជាផ្លូវការពីការបិទបណ្ដាញ Facebook, Twitter និង YouTube រួមទាំងវិបសាយមួយចំនួនរបស់កូរ៉េខាងត្បូង ដើម្បីគ្រប់គ្រងកុំឲ្យព័ត៌មានផ្ទៃក្នុងរបស់ខ្លួនលេចឮទៅខាងក្រៅ។
ការប្រកាសដែលធ្វើឡើងដោយក្រសួងប្រៃសណីយ៍ និងទូរគមនាគមន៍ បានចេញផ្សាយទៅដល់ក្រុមហ៊ុនសេវាទូរសព្ទដ៏ធំមួយក្នុងប្រទេស រួមទាំងបណ្ដាហាងដែលបម្រើអ៊ីនធឺណិតដល់អ្នកប្រើប្រាស់ មានទីតាំងនៅក្នុងទីក្រុងព្យុងយ៉ាង។ គួររំលឹកថា មានប្រជាជនកូរ៉េខាងជើងតិចណាស់ដែលមានអ៊ីនធឺណិតប្រើប្រាស់ ហើយបើមានក៏ស្ថិតនៅក្រោមការត្រួតពិនិត្យដ៏តឹងរឹងពីរដ្ឋាភិបាល។គោលការណ៍នៃការបិទប្រព័ន្ធបណ្ដាញទំនាក់ទំនងទាំងនេះនឹងធ្វើឲ្យជនបរទេសដែលចូលមកកាន់ទឹកដីរបស់ខ្លួន ឬសហគមន៍បរទេសប្រចាំនៅកូរ៉េខាងជើង ពិបាកក្នុងការបង្ហោះព័ត៌មានផ្ទៃក្នុងរបស់ប្រទេសទៅកាន់ពិភពខាងក្រៅ។
ការប្រកាសដែលធ្វើជាផ្លូវការនេះក៏បានបន្ថែមដែរថាជនណាដែលព្យាយាម hack ចូលទៅកាន់ប្រព័ន្ធបណ្ដាញ ឬវិបសាយដែលបានបិទនោះនឹងស្ថិតក្រោមការពិន័យរបស់ច្បាប់ប្រទេស។ គេមិនបានបញ្ជាក់ទេថាការពិន័យនឹងធ្វើឡើងរបៀបណា៕
